Аднолькавае харчаванне для ўсіх дзяцей

У беларускіх школах забяспечана аднолькавае харчаванне для ўсіх дзяцей, паведаміла журналістам у прэс-цэнтры БелТА начальнік аддзела па арганізацыі харчавання Нацыянальнага інстытута адукацыі Люцыя Міхальчук.
«Асноўны момант, які датычыцца арганізацыі харчавання, — гэта прадастаўленне адзіных рацыёнаў вучням ва ўстановах агульнай сярэдняй адукацыі. Адзіныя рацыёны для дзяцей, якія харчуюцца як за кошт сродкаў бюджэту, так і за кошт сродкаў бацькоў або іншых законных прадстаўнікоў», — расказала Люцыя Міхальчук.
Разам з тым, у некаторых бацькоў па-ранейшаму ўзнікаюць пытанні, прычым у большасці выпадкаў гэта неабгрунтаваныя прэтэнзіі. «Асноўная маса льготных катэгорый у Мінску (а гэта больш за 20 працэнтаў) атрымлівае двухразовае харчаванне, — адзначыла намеснік начальніка аддзела арганізацыі гандлю і грамадскага харчавання Галоўнага ўпраўлення спажывецкага рынку Мінгарвыканкама Марына Дзьякава. — Для дзяцей, якія атрымліваюць харчаванне за кошт сродкаў бюджэту, прадугледжаны снеданне і абед, а для дзяцей, якія харчуюцца за кошт сродкаў бацькоў і іх законных прадстаўнікоў, — адзін абед».
З улікам таго, што сталічныя школы даволі шматлікія і накарміць усіх дзяцей у адзін прыём немагчыма, харчаванне даводзіцца арганізоўваць на кожным перапынку. Тут і ўзнікае сітуацыя, калі дзеці льготных катэгорый прыходзяць снедаць, а дзеці на аснове аплаты — абедаць. «Але можаце быць упэўнены, што пазней дзіця з катэгорыі льготнікаў атрымае такі ж абед», — падкрэсліла Марына Дзьякава.
Як дадала Люцыя Міхальчук, калі ў канкрэтнай установе адукацыі ўзнікаюць праблемныя сітуацыі, то бацькі павінны паведамляць аб гэтым яго кіраўніку. «Калі пытанне не вырашаецца на гэтым узроўні, неабходна звяртацца ў аддзел упраўлення адукацыі на месцах, дзе ёсць спецыялісты, якія курыруюць пытанні харчавання. І гэта пытанне адназначна будзе вырашана», — сказала яна.

Добавить комментарий