Дзень неабмежаваных магчымасцей у РЦСАН

Хутка Новы год, падвядзенне вынікаў года. А ў аддзяленні дзённага знаходжання інвалідаў РЦСАН святочны настрой вітае ўжо зараз, нават ёлку ўпрыгожылі. 3 снежня там прайшло мерапрыемства, прысвечанае Дню інвалідаў. Такі дзень для аддзялен­ня сапраўды амаль навагодні: выкон­ваюць лепшыя твор­чыя нумары, атрымоўваюць падзякі і граматы, віншуюць пераможцаў розных конкурсаў.


У зале прысутнічалі выхаванцы, іх мамы і супрацоўнікі аддзялення – усе яны даўно адна сям’я. А ў госці да гэтай вялікай сям’і завіталі дырэктар РЦСАН Таццяна Салаўёва, намеснік дырэктара Вераніка Жойдзь, намеснік стар­шыні раённай арганізацыі РГА «Белая Русь» Дзіна Шамро.
Пад кіраўніцтвам загадчыка аддзялення Валянціны Самусевай выхаванцы падрыхтавалі канцэрт­ную праграму. Юлія Клімава прачытала аўтарскія вершы пра зіму, а Антон Маскалькоў выказаў словы падзякі ўсім прысутным мамам і прысвяціў ім верш. Здзіўлялі гасцей песнямі мясцовыя зоркі Анастасія Грачова, Сяргей ­Яўсееў, Андрэй Стражнікаў і ансамбль «Веселые ребята». Тамара Ібрагімава заваявала публіку танцам «Дачка Усходу», а вішанькай на торце свята стаў цыганскі танец. Усім выступоўцам гледачы шчыра апладзіравалі, падпявалі і актыўна падтрымлівалі.


На працягу канцэрта ўзгадваліся перамогі і поспехі. Шчыра павін­шавалі Аляксандра Рашэт­нікава з нядаўнім дасягненнем – перамогай у намінацыі «Містэр Рамантычнасць», якую ён прывёз з конкур­су «Містэр Х-2020», які праходзіў у Краснаполлі. Былі ўручаны падзякі бацькам выхаванцаў, валанцёрам аддзялен­ня Святлане Еўціхавай і Таісіі Сазанковай.
Напрыканцы свята госці падзякавалі выступоўцам за доб­рыя ўражан­ні, адзначылі цёп­лую сямейную абстаноўку ў аддзялен­ні і ўручылі яго навед­вальнікам салод­кія падарун­кі. «Наша аддзяленне – для людзей з неабмежаванымі маг­чымасцямі, – кажа Валянціна Самусева. – Творчыя таленты і імкнен­не ствараць новае ў нашых выхаван­цаў межаў не маюць!»
Дар’я Баравікова.

Добавить комментарий